నా చెలీ ......

కవిత 

1.విరులవాన కురిసినట్టు 
వెన్నెలమ్మ నవ్వినట్టు 
పరిమళించు గంధమేదో
పరవశాన తాకినట్టు 
అరుదెంచెను నా చెలీ, అరుదెంచెను నా చెలీ 

2. ఎంచి మంచి ముత్యాలను
దోసిలిలో నింపినట్టు
బంగారము రంగరించి
సింగారము జేసినట్టు
కనిపించెను నా చెలీ, కనిపించెను నా చెలీ

3. చుక్కలలో మెరుపుదెచ్చి
తనువులోన నింపినట్టు
అవనిలోని అందమంత
అతివలాగ మారినట్టు
అమరిందోయ్ నా చెలీ , అమరిందోయ్ నా చెలీ

4. తపనపడే తలపులన్ని
వలపుతోటి మూటగట్టి
చిలిపిమనసు వాకిలినీ
ఒడుపుగాను తెరచిపెట్టి
వలచిందోయ్ నా చెలీ, నిలిచిందోయ్ నా చెలీ

5. ఆ దివినేలెడి ఒక దేవత
నా మది గుడిలో వెలసినట్టు
అమర సుధల నందించగ
నన్నే కరుణించినట్టు
ఒదిగిందోయ్ నా చెలీ ,నాలో కరిగిందోయ్ నాచెలీ

నాగజ్యోతీ సుసర్ల
14-02-2015 .